With the name of Almighty ALLAH who is most merciful and beneficial.
Respected Readers,اسلام و علیکم
Mutram doston,
Main "Syed Adnan Ali Naqvi" ek dafa phir aap ki khidmat main hazir hon. Buhat din howe apne dil ki baat kahe howe, aur likhe howe. Aaj ALLAH Pak ne yea moqa diya hai toh socha main ap ko Ashiyana Camp, Miranshah, North Waziristan, ke halaat se agah karon.
Guzishta month meri har dil aziz behen "Syeda Faryal Zehra" Canada se wapas tashref laa kar Team Ashiyana ke flahi kamon main sharik hoin. Karachi, Lahore, Abotabad, Rawalpindi aur Karachi se bhi degar Dost, Family Members, Ahbab aur degar kisi na kisi tarhan Team Ashyana ke North Waziristan ke flahi kamon "Social work" main hissa lete hi rehte hain. ALLAH Pak sab ko Ajr-e-Azim atta farmaye - Ameen.
North Waziristan, ke hallat se buhat kaam he logon ko agahi hasil hoti hai. Main jab bhi Ashiyana Camp Miranshah main hota hon esa mehsoos hota hai ke jese iss dunya main nahi balke kisi aur Planet ke kisi hisse main muqem hon. jahan ghurbat, aflas, bhook, daar aur khoof hamesha mojood rehta hai. kabhi apnon ke hathon qatal ho jane ka khoof, kabhi gheron ke hathon mare jane ka khoof. iss par mushkil ye hai ke mujh ko aur yahan (Miranshah, North Waziristan) main mojood buhat hi kaam logon ko yeah ilm (maloom) hota hai ke akhir kis jurm ki saza pai hai. Kiun kar qatal howe, buss mare jane par khamoshi se tamam rasomat adda karo aur phir se zindagi ki talash main lag jao.
Buhat lamba waqt howa keh Karachi main muqim apne gher walon se baat hoi ho. Yahan (Miranshah) ajane ke baad jese tamam dunya se rabita he khatam ho gaya hai. Zindagi jese ek muqam par tham se gai hay. Roz jeeta hon aur roz marta hon. kabhi khud ko buhat khush qismat (lucky) samjhta hon keh aik azim maqsad ke liye nikla hon aur kabhi khud ko buhat he bad qismat (unlucky) ke mujh ko bhi zindagi ki tamam tar khushiyan aur aram mayasar asakte hain toh main ye kin chakaron main par gaya hon. kabhi kabhi yar dost mujh ko ahsas dilate hain kai buhat ho gaya abhi gher wapas ajao phir khayal aata hai ke agar main bhi gher wapas chala gaya toh jo thode buhat logon ki maddad ho rahi hai inn ka kia hoga.
Main ne yahan buhat bachon ko bigarte dekha hai. Yahan logon ki majborian kharidi jati hain aur phir in zaindagiun ko kuch log ghalat kam main istimal karte hain. khud in bachon aur logon ko pata nahi hota kai akhir in ke sath ho kia raha hai. Taleem na hone ke sabab yahan ke logon main sochne aur samjhne ki slahiyat hi khatam ho chuki hai aur kuch maqsoos halat ki wajha se yahan ke log khud kuch sochne aur samjhne ke qabil hi nahi rahe. bus jo inn ke baron (sardaron, khan aur Malik) ne keh dia wohi in ke liye hurf -e- akhir hota hai. Aur phir yahan (North Waziristan) ke loog wohi karte hain jo inn ke bare chahte aur behter samjhte hain. Jo koi in ke khilaf jata hai woo kafir ho jata hai ya phir ghadar aur iss ki saza sirf aur sirf mout hai.
Guzishta barson se flahi kamon ke mission ke doran mujh ko buhat dafa in baron se milne ka itifaq howa, kabhi mujh ko apne muslim hone ka yain dilana para kabhi mujh ko yahan ke logon ka wafadar hone ka yaqin dilana para. Magar main ne aik baat sabhi ke samne buhat khul kar kahi kai hum sab ka mustaqbil Pakistan ki salamti say hai aur main yahan sirf aur sirf yahan ke logon ki maddad karne ke gharz se aya hon. Ab zindagi aur mout to ALLAH Pak ne te kar rakhi hai jab tak aur jahan tak zindagi ka safar hona hay woh ho kar hi rahe ga. aur jo jo mushkilat raste main aani hain unn ka samna pori diyanatdari aur mehnat, himat sabar aur istiqamat se karna hoga. iss ke elawa na koi rasta hai aur na hi koi sabeel.
Social work ke iss safar main kabhi bachon ko muhhtalif bemariun se marte dekha, kabhi khwateen ko zachgi ke doran marte dekha, kabhi buzurgon ko dawa ki kami ke sabab marte dekha. Aur jab jab main khud ko kamzoor samjhta apne RAB se ek hi dua karta, "Aye Mere RAB, mujh ko hosla Aata Farma". aur mere RAB ne mujh ko hosla dia. aur kuch na kuch behtri aye. Main yahan sare ke sare logon ko toh tabdil nahi karsaka magar kuch loog aise sathi zaroor ban gaiye jin ke sath yahan mera rehna kafi assaan ho gaya. magar phir bhi har lamha aik khoof rehta hai ke agar meri koi baat, koi harkat yahan ke logon ko nagawar guzri toh kia hoga.
Main apni har subh ka aghaz isi dua ke sath karta hon "Aaj ka din behter aur umid afza guzre" aur jab raat hoti hai tu yehi dua hoti hai "Ye raat jitna jaldi guzar sakti hai guzar jae."
Likhne ko aur bhi buhat kuch hai magar himat nahi kar paa raha hon. kiun ke akasar doston ko yehi shiykayat rehti hai keh main yahan ke logon ke dukh bhari kahani suna kar un ko bhi ranjida kar deta hon. magar aisa na karon toh aur kia karon?
Aap sab mere haq main dua karen, Team Ashiyana ke haq main dua karen, Yahan (North Waziristan) ke logon ke haq main dua karen k ALLAH Pak hum sab ko himat de, sabar de, hosla de, aur istiqamat de ke hum yahan ke mushkil tareen aur pareshan kun halat ke bawajood yahan ke logon ke darmiyan reh kar in ko jinene ka maqsad bata saken. Yahan ke logon main taleem ki ahmiyat ko jaga saken, yahan ke logon main haq aur sach ka faraq phela saken.
In Sha ALLAH buhat jald aur bhi likhon gaa.
Team Ashiyana (Miranshah, North Waziristan) ke flahi kamon main jis qadar bhi madad mere doston, sahtiun, rishtedaron aur ahbab ne kari hai un sab ka dil ki gehraiun se shukar guzar hon . Aur umid karta hon k aane wale waqt main aap log kisi na kisi tarhan mera sath dete rahen gain. ALLAH Pak aap ko Ajr -e- Azim de. Ameen.
Jazak ALLAH
Aap ka bhai / Dost
Syed Adnan Ali Naqvi
